Falskt símaöryggi í útlöndum

Símafyrirtæki mættu auglýsa betur hvernig íslenskir símar virka í útlöndum. Það vita jú allir að það er rándýrt að hringja úr þeim í útlöndum – óheyrilega dýrt. Því bregða margir á það ráð að senda sms nema hvað þau skila sér ekki og þau sem send eru á þá ekki heldur. Þetta skapar óþarfa vandræði og veldur oftar en ekki óheppilegum misskilningi. Það vita heldur ekki allir að sumir símarnir eru óvirkir í útlöndum, hvorki hægt að hringja úr þeim eða í – og því mætti allt eins skilja þá eftir heima. Það getur skipt sköpum að hafa virkan síma í útlöndum, t.d. ef í nauð rekur, og því er það ófyrirgefanlegt að ekki sé upplýst betur hvað gera þurfi til þess að símar í íslenskri áskrift virki erlendis.