Eftir um 12 tíma samningaviðræður hefur samkomulag náðst. Árið 2020 verður skuldahlutfall Grikklands svipað og Þýskalands og Hollands eða 120,5%. Samkomulagið gerir Grikklandi kleift að borga 14,5 milljarða evra afborganir fyrir 20. mars. Samkvæmt France Info verða 53,5% skulda Grikklands afskrifuð og eru það bankarnir sem taka það á sig, um 107 milljarðir evra. Samkvæmt Le Monde verða vextir af fyrri lánum lækkaðir (Grikkland fékk 110 milljarða lánaloforð í maí 2010 [hefur fengið 73] en 130 nú). En blóðfórn grísks almennings og ríkis er óheyrileg.
Íslendingar voru nú ekkert sérstaklega hrifnir af AGS á Íslandi, nú, Grikkir ekki heldur. Þeir þurfa að þola mun stærri fastanefnd sérfræðinga á vegum troika eða þrenningarinnar (AGS, ESB og Evrópski seðlabankinn), sem mistókst reyndar fyrir tveimur árum að greina vandann rétt. Það sem Grikkjum mislíkar skiljanlega mjög er að til stendur að lánið verði sett á sérstakan reikning til að tryggja að Grikkir fái sjálfir sem allra minnst. Þess utan skal forgangur lánardrottna negldur í stjórnarskrá innan tveggja mánaða (þrenningin er hrædd við kosningarnar í apríl). Síðan skal skera enn frekar niður… eins og það sé hægt!
Evruhópurinn, þ.e. fjármálaráðherrar evruríkjanna 17, kemur næst saman 2. mars nk.
Það er athyglisvert viðtal við fyrrverandi fjármálaráðherra Argentínu, Roberto Lavagna, í Libération á sunnudag: Við völdum að bjarga fólkinu fremur en bönkunum.